Kocha wa zamani wa Manchester United, Erik ten Hag, amejikuta kwenye headlines tena baada ya kutimuliwa na Bayer Leverkusen ndani ya siku 62 pekee tangu aajiriwe.
Ten Hag alisimamia michezo mitatu pekee – miwili ya Bundesliga na mmoja wa Kombe la DFB-Pokal – kabla ya uongozi wa klabu hiyo kuvunja mkataba wake kwa kile kilichoelezwa kushindikana kwa “mpango wa kujenga upya kikosi.”
Ten Hag aliteuliwa Mei mwaka huu kuchukua nafasi ya Xabi Alonso, aliyerejea Madrid baada ya msimu wenye mafanikio na Leverkusen. Mashabiki walitarajia kocha huyo Mholanzi kuendeleza mafanikio hayo, lakini mwanzo wake uligeuka kuwa changamoto kubwa.
Alianza vyema kwenye Kombe la DFB-Pokal, akiiongoza Leverkusen kupata ushindi wa mabao 4-0 dhidi ya timu ya daraja la nne, SG. Hata hivyo, kwenye Bundesliga hali ilikuwa tofauti kabisa:
- Mechi ya kwanza: walipoteza nyumbani kwa mabao 2-1 dhidi ya Hoffenheim, licha ya kuanza kuongoza kupitia bao la Jarell Quansah.
- Mechi ya pili: walishindwa kulinda uongozi wa mabao 3-1 dhidi ya Werder Bremen waliokuwa na wachezaji 10, na mchezo kumalizika kwa sare ya 3-3.
Matokeo hayo yaliiacha Leverkusen ikiwa nafasi ya 12 kwenye msimamo wa Bundesliga, jambo lililoongeza presha kubwa kwa Ten Hag mapema mno kabla hata ya mapumziko ya kimataifa.
Sababu za Kutimuliwa
Kwa mujibu wa Simon Rolfes, Mkurugenzi wa Michezo wa Bayer Leverkusen, uamuzi wa kumtimua Ten Hag haukuwa rahisi lakini ulikuwa lazima.
“Wiki za karibuni zimeonyesha kwamba kujenga kikosi kipya na mafanikio chini ya mfumo huu haiwezekani. Tunaamini bado tuna kikosi chenye ubora, hivyo tunahitaji muundo mpya wa kiufundi.”
Kwa upande wake, Ten Hag hakusita kulalamika baada ya sare dhidi ya Bremen, akieleza kwamba kikosi chake hakikuwa tayari, baadhi ya wachezaji hawakuwa fiti, na timu kwa ujumla ilishindwa kudumu na kasi hadi mwisho wa mechi.
Changamoto za Kikosi
Leverkusen ilipoteza nyota wake muhimu majira haya ya kiangazi akiwemo Florian Wirtz, Jeremie Frimpong, Jonathan Tah na Granit Xhaka. Kuondoka kwa mastaa hawa kuliacha pengo kubwa na kuifanya timu kuingia msimu mpya ikiwa dhaifu.
Licha ya kufanya usajili mkubwa – ikiwa ni pamoja na kumchukua kinda Eliesse Ben Seghir kwa €35 milioni kama mchezaji wao wa 16 kwenye dirisha la usajili – bado kikosi hakikuonyesha muunganiko mzuri chini ya Ten Hag.
Historia ya Karibu ya Ten Hag
Kabla ya kibarua cha Leverkusen, Ten Hag alikaa nje ya soka kwa miezi saba baada ya kufutwa kazi na Manchester United Oktoba mwaka jana. Aliondoka Old Trafford wakati timu hiyo ikiwa nafasi ya 14 kwenye msimamo wa Ligi Kuu England, baada ya kushinda michezo minne pekee kati ya 14. Kwa hiyo, nafasi ya Leverkusen ilikuwa mtihani wake wa kwanza kurejea katika soka kubwa barani Ulaya – lakini safari yake imekatishwa mapema zaidi ya matarajio ya wengi.
Nini Kinafuata kwa Leverkusen?
Kwa sasa, mazoezi ya kikosi cha kwanza yamekabidhiwa kwa benchi la makocha wasaidizi huku klabu ikitafuta mrithi rasmi. Uongozi umesisitiza kuwa bado una imani na kikosi kilichopo na lengo lao ni kurejesha utulivu mapema iwezekanavyo.